ބަރަކު އޮބާމާގެ ޙަޔާތަށް ބަލައިލުމެއް
އެދުވަސްވަރު ބަރަކްގެ ބައްޕައަށް ލިބުނު ސްކޮލާސިޕްއެއްގައި އޭނާގެ ހުވަފެން ހަގީގަތަކަށް ހެދުމަށްޓަކައި ހަވާއީއަށް ދިޔައެވެ. އެދުވަސްވަރު އޮބާމާގެ ބައްޕައާއި މަންމަ ދިމާވިއެވެ. މިދެމީހުން ކިޔަވަމުން ދިޔައީ މަނާއޯގައި ހުންނަ ޔުނިވަރސިޓީ އޮފް ހަވާއީގައެވެ.އެދުވަސްވަރު މި ދެމީހުންގެ ދޭތެރޭގައި ގާތް ގުޅުމެށް އުފެދުނެއެވެ. މިދުވަސްވަރު ޑުންހަމް އަށް ބަރަކް އޮބާމާ ލިބުނެއެވެ. އޮބާމާ ލިބުމަށްފަހު އެދެމަފިރިންނަށް މާގިނަ ދުވަހު އުޅެވޭގޮތެއް ނުވިއެވެ. އޮބާމާގެ އުމުރުން ދެ އަހަރުގައި އޭނާގެ މަންމައާއި ބައްޕަ ވަކިވިއެވެ. އެއަށްފަހު އޮބާމާގެ ބައްޕަ ޕީ.އެޗް.ޑީ ހާސިލްކުރުމަށްޓަކައި ހަވާރޑްއަށް ބަދަލުވިއެވެ. އަދި ކިޔަވާނިންމުމަށްފަހު ކެންޔާއަށް ދިރިއުޅުން ބަދަލުކުރިއެވެ.
އޮބާމާގެ ބައްޕައާއި ވަކިވުމަށްފަހު ޑުންހަމް އިތުރު ކައިވެންޏެއް ކުރިއެވެ. އެކައިވެނި ކޮށްފައިވަނީ އެސްޓް-ވެސްޓް ސެންޓަރގައި އެދުވަސްވަރު ކިޔަވަމުންދިޔަ އިންޑޮނާސިއާގެ ރައްޔިތެއް ކަމުގައިވާ ލޯލޯ ސޮއިޓޯރޯ އާއިއެވެ. މިއާއިލާ 1967 ވަނަ އަހަރު އިންޑޮނާސިއާގެ ޖަކާޓާއަށް ދިރިއުޅުން ބަދަލު ކުރިއެވެ. މިދުވަސްވަރު ޑުންހަމްއަށް އަންހެން ކުއްޖަކު ލިބުނެއެވެ. އޮބާމާ އެދުވަސްވަރު ޖަކާޓާގެ ސްކޫލްއަކަށް ކިޔަވަންދިޔައެވެ. އެސްކޫލްގައި ކިޔަވައިދެނީ އިންޑޮނާސިއާ ބަހުންނެއެވެ(އެމެރިކާގެ ރިޔާސީ އިންތިހާބު ކުރިއަށް ދިޔަ ދުވަސްވަރު އިންޑޮނާސިއާގައިވެސްވަނީ އޮބާމާއަށް ކެމްޕެއިން ކޮށްފައެވެ).
1971ވަނަ އަހަރު އޮބާމާގެ މާމައައާއި ކާފައާއި އެކު ދިރިއުޅުމަށްޓަކައި އެމެރިކާގެ ހަވާއީއަށް ދިރިއުޅުން ބަދަލުކުރިއެވެ.އޮބާމާގެ މާމަ ވަނީ 2008ވަނަ އަހަރުގެ ރިޔާސީ އިންތިހާބު ފެށުމުގެ ދެދުވަސްކުރިން ނިޔާވެފައެވެ. 1995ވަނަ އަހަރު އޮބާމާގެ މަންމަ ޑުންހަމް ރަހިމުގެ ކެންސަރުގެ ސަބަބުން ވަނީ ނިޔާވެފައެވެ.
އޮބާމާގެ ދިރިއުޅުން ހަވާއީ އަށް ބަދަލުވުމަށްފަހު އޭނާ އެންމ ފުރަތަމަ ތައުލީމު ހާސިލްކުރުމަށް ގޮސްފައިވަނީ ޕުނާހައު އެކެޑަމީއަށެވެ. 1979ވަނަ އަހަރު އޮބާމާ ވަނީ އެއެކަޑަމީ ގުރެޖުއޭޓް ވެފައެވެ. އެއަހަރު އެއެކަޑަމީން ގުރެޖުއޭޓް ވެފައިވަނީ ކަޅު ނަސްލުގެ ތިން ކުދިންނެއެވެ. އޮބާމާ އެންމެ ފުރަތަމަ ނަސްލީ ތަފާތު ކުރުންތަކާ އެންމެ ފުރަތަމަ ވިސްނަންފެށުނީ މިސަބަބާހުރެއެވެ.
އޮބާމާގެ މަންމައާއި ބައްޕަގެ ކައިވެނި ރޫޅުނ ފަހުން އޮބާމާއަށް އޭނަގެ އަސްލު ބައްޕަ ފެނިފައިވަނީ އެންމެ ފަހަރަކުއެވެ.އެއީ 1971ވަނަ އަހަރު އޮބާމާގެ އުމުރުން އެންމެ 10އަހަރުގައެވެ. އޮބާމާގެ ބައްޕަ މަރުވެފައިވަނީ 1982ވަނަ އަހަރު ކެންޔާގައި ހިނގި ކާރު އެކްސިޑެންޓެއްގައެވެ.
އޮބާމާ ހައި ސްކޫލް ނިންމުމަށްފަހު ތައުލީމު ހާސިލްކުރުމަށްޓަކައި ދެންދިޔައީ ލޮސްއެންޖަލަސްގައި ހުންނަ އޮކްސިޑެންޓަލް ކޮލެޖަށެވެ. އެކޮލެޖުގައި ދެއަހަރު ހޭދަ ކުރުމަށްފަހު ދެންބަދަލުވީ ނިއުޔޯކުގައި ހުންނަ ކޮލަމްބިއާ ޔުނިވަރސިޓީއަށެވެ. މި ޔުނިވަރސިޓީން 1983ވަނަ އަހަރު ޕޮލިޓިކަލް ސައިންސްގެ ދާއިރާއިން ފުރަތަމަ ޑިގްރީ ހާސިލްކުރިއެވެ.
1985ވަނަ އަހަރު އޮބާމާގެ ދިރިއުޅުން ޗިކާގޯއަށް ބަދަލުކުރިއެވެ. އެދުވަސްވަރު ޗިކާގޯގެ ދެކުނުގައި ހުންނަ ޓިރިނިޓީ ޔުނައިޓެޑް ޗާރޗް އޮފް ކުރިސްޓްގައި އޮބާމާ ވަނީ މަސައްކަތްކޮށްފައެވެ. އޮބާމާވަނީ އޭނާގެ ގާތްތިމާގެ މީހުންނާ ބައްދަލުކުރުމަށްޓަކައި ކެންޔާއަށްވެސް ގޮސްފައެވެ.މިދަތުރުތަކުގެ ތެރޭގައި އޭނާގެ ބައްޕައާއި ކާފައަށް ޒިޔާރާތް ކުރުމަށް ކުރި ދަތުރުވެސް ހިމެނެއެވެ.
1988 ވަނަ އަހަރު ހަވާރޑު ލޯ ސްކޫލްއަސް ވަނެއެވެ. 1990ވަނަ އަހަރުގެ ފެބްރުއަރީ މަހު ހަވާރޑު ލޯ ރިވިއުގެ އެޑިޓަރގެ މަގާމަށް ބަރަކް އޮބާމާ އިންތިހާބު ކުރެވުނެއެވެ. އޮބާމާ އަކީ ހަވާރޑް ލޯ ރިވިއުގެ އެޑިޓަރގެ މަގާމަށް އިންތިހާބުވި ފުރަތަމަ އެފްރިކަން އެމެރިކަން ނަސްލުގެ މީހާއެވެ.1991 ވަނަ އަހަރު ހަވާރޑް ލޯ ސްކޫލުން އެންމެ މަތީ ދަރަޖައިގައި (މަގްނާ ކަމް ލައުޑީ) އޮބާމާ ގުރެޖުއޭޓް ވިއެވެ.
ލޯ ސްކޫލުން ކިޔެވުމަށްފަހު އެނބުރި ޗިކާގޯ އަށް ބަދަލުވިއެވެ. ޗިކާގޯގެ ލޯ ފާރމްއެއް ކަމުގައިވާ މައިނަރ، ބަރންހިލް އެންޑް ގެލެންޑް ގައި ގާނޫނީ ވަކީލެއްގެ ގޮތުން މަސައްކަތް ކުރަމުންދިޔައެވެ. އަދި ޔުނިވަރސިޓީ އޮފް ޗިކާގޯ ލޯ ސްކޫލް ގައި ކިޔަވައިދިނެއެވެ. 1992ވަނަ އަހަރު ރިޔާސީ އިންތިހާބުގައި ބިލް ކުލިންޓަން ކެމްޕެއިން ކުރަމުން ދިޔަ ދުވަސްވަރު އާންމުންނަށް ވޯޓުލާން ރަޖިސްޓްރީ ކުރުމުގައި ވަރަށް ގިނަ ކަންތައްތަކެއް ކުރުމަށް އެހީތެރިވެދީފައިވެއެވެ.
އޮބާމާ ވަނީ 1995ވަނަ އަހަރު އޭނާގެ އޮޓޯބައޮގުރަފީއެއް ނެރެފައެވެ. މިފޮތުގެ ނަމަކީ ޑްރީމްސް ފުރޮމް މައި ފަދަރ: އަ ސްޓޯރީ އޮފް ރޭސް އެންޑް އިންހެރިޓެންސް އެވެ. މިފޮތުގެ އޯޑިއޯ ވާރސަނުން އޮބާމާއަށް ވަނީ ގުރެމީ ލިބިފައެވެ.
އޮބާމާގެ ވިސްނުމާއި ފިކުރު ހުރި ގޮތުން އެދުވަސްވަރު އިލިނޮއީގެ ސްޓޭޓް ސެނެޓްއަށް ޑިމޮކުރެޓިކް ޕާޓީގެ ފަރާތުން ކުރިމަތިލާން ނިންމިއެވެ. 1996ވަނަ އަހަރު އޭނާ އިލިނޮއީގެ ސްޓޭޓް ސެނެޓަރެއްގެ މަގާމަށް އިންތިހާބުވިއެވެ. އޮބާމާ އިންތިހާބުވީ އިލިނޮއީގެ ދެކުނު ސަރަހައްދުގައިވާ ހައީޑު ޕާރކުގެ ގޮނޑިއަށަވެ. އޮބާމާ ސްޓޭޓް ސެނެޓްގައި މަސައްކަތް ކުރަމުންއައި ދުވަސްވަރު ޑިމޮކުރެޓިކް އަދި ރިޕަބުލިކަން ސެނެޓަރުންނާއެކު ވަރަށް ގިނަ މަސައްކަތްތަކެއް ވަނީ ކޮށްފައެވެ. މިގޮތުން ސިއްހީ ހިދުމަތް ފުޅާކުރުމުގެ ގޮތުން އެކުލަވާލި ބިލަކާއި ޅައުމުރުގައި ޔަތީމު ކުދިންނަށް ތައުލީމު އުނގެނުމަށް މަގުފަހިކުރުމުގެ ގޮތުންވެސް ބިލެއް އެކުލަވާލައި ސެނެޓަށް ހުށަހެޅިއެވެ.
2000ވަނަ އަހަރު ޑިމޮކުރެޓިކް ޕާޓީގެ ފަރާތުން ހައުސް އޮފް ރިޕުރެޒުންޓިވްސްގެ ގޮނޑިއަކަށް ކުރިމަތިލިއެވެ. އެހެންނަމަވެސް ޑިމޮކުރެޓިކް ޕާޓީގެ ޕުރައިމެރީގައި ހަތަރު ދައުރު އެ ގޮނޑި ކާމިޔާބުކުރައްވާފައެވާ ބޮބީ ރަސް އާ ވާދަކޮށް ނާކާމިޔާބުވިއެވެ.
އޮބާމާއަކީ އެންމެ ފުރަތަމަވެސް އިރާގު ހަނގުރާމާއާ ދެކޮޅުހަދައި ވަރަށް ގިނަ ވާހަކަތަކެއް ދައްކަމުންދިޔަ މީހެކެވެ.އޭނާވަނީ ސްޓޭޓް ސެނެޓްގައި މިކަމާ ދެކޮޅަށް ވާހަކަދަޢްކާފައެވެ. އަދި މިހަނގުރާމައާ ދެކޮޅުހެދުމުގެ ގޮތުން2002ވަނަ އަހަރު ޗިކާގޯގެ ފެޑްރަލް ޕްލާޒާގައި ބޭއްވި ރެލީއެއްގި މިކަމާ ދެކޮޅުހަދާ ވާހަކަ ދެއްކިއެވެ.
2003 ވަނަ އަހަރު އޮބާމާ ޔޫ.ސް ސެނެޓްގެ ގޮނޑި އަކަށް ކުރިމަތިލާންނިންމިއެވެ. އެއީ ރިޕަބުލިކަން ސެނެޓަރެއްކަމުގައިވާ ޕީޓަރ ފިޓްގެރަލްޑް އޭނާގެ ގޮނޑި ދޫކޮށްލުމުންނެވެ. އެގޮނޑިއަށް ޑިމޮކުރެޓިކް ޕާޓީގެ ފަރާތުން ވާދަކުރައްވާނެ ބޭފުޅަކު ހޮވުމަށްޓަކައި ޕްރައިމެރީއެއް ބޭއްވުނެއެވެ. މިޕްރައިމެރީގައި މަލްޓި މިލިނިއަރެއްކަމުގައިވާ ބުލެއަރ ހަލް އަދި އިލިނޮއީގެ ކޮމްޕްޓުރޯލާރ ޑެނިއަލް ހައިންސްއާ ވާދަކޮށް އޮބާމާވަނީ 52% ވޯޓް ހޯއްދަވައި އެއިންތިހާބު ކާމިޔާބު ކުރައްވާފައެވެ.
2004ވަނަ އަހަރު ބޮސްޓަންގައި ބޭއްވުނު ޑިމޮކުރެޓިކް ނެސެނަލް ކޮންވެންސަންގައި ޖޯން ކެރީ އަށް ތާއިދުކުރުމުގެ ގޮތުން ވާހަކަ ދެއްކުމުގެ ފުރަސަތު ލިބުނެއެވެ. މި ކޮންވެންސަންގައި އޮބާމާ ވަރަށް ބޮޑަށް މަސްހޫރުވިއެވެ.
ކޮންވެންސަންއަށް ފަހު އިލިނޮއީ އަށް އައިސް އާންމު އިންތިހާބުގެ ކެންޕެއިން ކުރަންފެށިއެވެ. އޮބާމާ އާއި އާންމު އިންތިހާބުގައި ވާދަކުރެއްވީ ރިޕަބުލިކަން ޕްރައިމެރީ ކާމިޔާބު ކުރެއްވި ޖެކް ރަޔާންއެވެ.އެހެންނަމަވެސް އިންތިހާބު ފެށުމުގެ ކުރިން ޖެކް ރަޔާން އިންތިހާބުން ވަކިވާންޖެހުނެއެވެ. އެއީ އޭނާގެ ބަދުއަހްލާގީ މައްސަލަތަކެއް ފެންމަތިވުމާ ގުޅިގެންނެވެ. އެއަށްފަހު ރިޕަބުލިކަންގެ ޓިކެޓް ލިބިވަޑައިގަތީ ޑިޕްލޮމެޓް އަދި ކުރީގެ ރިޔާސީ ކެންޑިޑޭޓެއްކަމުގައިވާ އެލެން ކެޔޭސް އަށަވެ. އެލެން އަކީވެސް އެމެރިކަން-އެފްރިކަން އެކެއެވެ.
ނޮވެމްބަރ 2004ގައި ބޭއްވުނު އާންމު އިންތިހާބު އޮބާމާ ކާމިޔާބުކުރެއްވިއެވެ. ވޯޓްގެ %70 ލިބުނީ އޮބާމާ އަށެވެ. އެލެން ލިބުނީ އެންމެ %27 ވޯޓެއެވެ. މިކާމިޔާބުވީ އިލިނޮއީގެ ތާރީހުގައިވެސް އާންމު އިންތިހާބުގައި ވާދަކުރެއްވި ބޭފުޅަކަށް ލިބުނު އެންމެ ބޮޑު ކާމިޔާބީއަށެވެ. އަދި އޮބާމާ ވެފައިވަނީ އެމެރިކާގެ ސެނެޓަށް އިންތިހާބުވި ތިންވަނަ އެފްރިކަން-އެމެރިކަން ނަސްލުގެ ސެނެޓަރަށެވެ.
ބަރަކް އޮބާމާ ސެނެޓެރުކަމުގެ ހުވާކުރައްވާފައިވަނީ 2005ވަނަ އަހަރުގެ ޖެނުއަރީ މަހުގެ 4 ވަނަ ދުވަހުއެވެ. އޮބާމާ އާއި ރިޕަބުލިކަން އަދި އިންޑިއާނާ ތަމްސީލްކުރައްވާ ސެނެޓަރ ރިޗަރޑް ލޫގަރ ދެބޭފުޅުން ގުޅިގެންވަނީ ވަރަށް މުހިއްމި ބިލެއް ސެނެޓަށް ހުށަހަޅާފައެވެ. އެއީ އިރުމަތީ ޔޫރަޕްގައާއި ރަސިއާގައިވާ ގެއްލުންދޭ ހަތިޔާރުތައް ނައްތާލުމުގެ މަސައްކަތް ކުރުމަށް މަގުފަހިކުރުމުގެ ގޮތުން އެކުލަވާލި ބިލެކެވެ. އަދި ރިޕަބުލިކަން އަދި އޮކްލަހޯމާ ތަމްސީލް ކުރައްވާ ސެނެޓަރ ޓޮމް ކޯރބާން އާއި އޮބާމާ ގުޅިގެން ސަރުކާރުން ކަންތައްތަކަށް ހަރަދުކުރާ ގޮތުގެ މައުލޫމާތު ހިމަނައިގެން ވެބްސައިޓެއް ހަދައިފައެވެ. އެންމެ ފުރަތަމަ އޭވިއަން ފުލޫ އާއި ބެހޭގޮތުން އެމެރިކާގެ ސެނެޓުގައި ވާހަކަދެއްކެވީވެސް އޮބާމާއެވެ. އަދި ހަރިކޭން ކެތްރީނާގެ ސަބަބުން ހާލުގައި ޖެހިފައިވާ މިހުންނާ ބެހޭގޮތުންވެސް ސެނެޓުގައި އޮބާމާ ވާހަކާ ދައްކާފައިވެއެވެ.
އޮބާމާ ދެވަނައަށް ލިޔުނު ފޮތް ނެރެފައިވަނީ އޮކްޓޫބަރ 2006ގައެވެ. އެފޮތުގެ ނަމަކީ
"The Audacity of Hope: Thoughts on Reclaiming the American Dream".
2007 ވަނަ އަހަރުގެ ފެބްރުއަރީ މަހު އޮބާމާ 2008ވަނަ އަހަރު އޮންނަ ރިޔާސީ އިންތިހާބުގައި ވާދަކުރައްވާނެކަމަށް އިއުލާން ކުރިއެވެ. ރިޔާސީ އިންތިހާބުގައި ވާދަކުރައްވާނެ ބޭފުޅަކު ހޮވުމަށް ޑިމޮކުރެޓިކް ޕާޓީގެ ޕުރައިމެރީގައި އޮބާމާ އާއި އެންމެ ވާދަކުރެއްވީ އެމެރިކާގެ ކުރީގެ މަހާރެހެންދި އަދި މިހާރު ސެނެޓުގައި ނިއު ޔޯކު ތަމްސީލް ކުރައްވާ ހިލަރީ ރޯޑްހަމް ކުލިންޓަން އެވެ. އެހެންނަމަވެސް ރިޔާސީ ޕްރައިމެރީ ނުނިމެމީސް ޑިމޮކުރެޓިންގެ ރިޔާސީ ޓިކެޓް އޮބާމާއަށް ޔަގީންވިއެވެ.
2008ވަނަ އަހަރު ނޮވެމްބަރ މަހުގެ 4ވަނަ ދުވަހު ބޭއްވުނު އެމެރިކާގެ ރިޔާސީ އިންތިހާބު ކާމިޔާބު ކުރައްވާފައިވަނީވެސް ބަރަކް އޮބާމާ އެވެ. މި އިންތިހާބުގައި އޮބާމާ އަށް އިލެކްޓުރަލް ވޯޓުގެ %52 ލިބުނެއެވެ .އޮބާމާ އަކީ އެމެރިކާގެ ފުރަތަމަ ކަޅު ނަސްލުގެ ރައީސް އެވެ. އެމެރިކާގެ 44ވަނަ ރައީސް ދުނިޔޭގެ އެންމެ ހައިބަތު ބޮޑު އަދި ސާނާ ސައުގަތު އެކުލެވިގެންވާ ވައިޓް ހައުސް އަށް ވަދެވަޑައިގަންނަވާނީ 2009ވަނަ އަހަރުގެ ޖެނުއަރީ މަހުގެ 20ވަނަ ދުވަހުއެވެ.
އޮބާމާ އޭނާގެ އަންހެނުންނާ(މައިކަލް) އެންމެ ފުރަތަމަ ދިމާވެފައިވަނީ 1988ވަނަ އަހަރު ޗިކާގޯ ލޯ ފާރމް އޮފް ސިޑްލޭ އެންޑް އަސްޓިން ނުންނެވެ. މިދެ މީހުން ކައިވެނި ކޮށްފައިވަނީ އޮކްޓޯބަރ 1992ގައެވެ. އެދެމަފިރިންނަށް މިހާރުވަނީ ދެކުދިން ލިބިފައެވެ. އެއީ 10އަހަރުގެ މާލިއާއި 7އަހަރުގެ ސާސާ އެވެ. ބަރަކް އޮބާމާ މިހާރު ދިރިއުޅެމުން އަންނަނީ ޗިކާގޯގެ ދެކުނުގެ ސަރަހައްދުގައިވާ ކެންވޫޑް ގައެވެ.
